UWW Frank Çamiso – Turan Bayramov məsələsi ilə bağlı qərar verib.

Prosport.Az-ın xəbərinə görə, Turan Bayramovun qalib kimi lisenziya qazanması təsdiq olunub. Çünki Beynəlxalq Güləş Qaydalarının 53-cü maddəsinə görə, xalça üzərində qalib elan edildikdən sonra görüşün nəticəsi dəyişdirilə bilməz.

Frank Çamiso isə 9 mayda İstanbulda keçiriləcək Dünya Olimpiya Təsnifat Turnirində mübarizə aparmalı olacaq. İntizam Palatasının xahişinə əsasən, İtaliya güləşçisi həmin lisenziya turnirində səpələnmişlər səbətində yer alacaq.

İntizam Palatası hakimlərin bu görüşdə səhv etdiyini təsdiqləyib və referilərin cəzasını açıqlayıb. Belə ki, Roman Pavlov (Ukrayna) və İbrahim Cicioğlu (Türkiyə) 31 dekabradək, Ali Sayvan (İraq) 30 sentyabradək, Aleksey Bazulin (Rusiya), eləcə də Kamel Buaziz (Tunis) və Keysi Qössl (ABŞ) 30 iyunadək hakimlikdən uzaqlaşdırılıb. Bu isə o deməkdir ki, onlar Paris Olimpiadasında iş başında ola bilməyəcək.

Qeyd edək ki, bunlardan Roman Pavlov xalça hakimi, Ali Sayvan kənar hakim, Aleksey Bazulin xalça hakimləri üzrə rəhbər idi. Kamel Buaziz, İbrahim Cicioğlu və Keysi Qössl isə Hakimlər Komissiyasının nümayəndələri olub.

Səbuhi Musa