"Qəbələ" finalda "Neftçi"ni 1:0 hesabı ilə məğlub edərək Azərbaycan Kubokunun qalibi olub.

Prosport.Az xəbər verir ki, matçdan sonra bölgə klubunun prezidenti Fariz Nəcəfov jurnalistlərin suallarını cavablandırıb:

– Komandaya, məşqçilər korpusuna təşəkkür edirəm. Layiqli qələbə qazandıq. Həm çempionatda 4-cü yeri, həm də kuboku nəzərdə tuturam. Bütün azarkeşlərimizi təbrik edirəm.

– Heyəti qoruyub saxlamaq çətin olmayacaq?
– Çox çətindir. Amma komandanın əsas sütununu qorumağa çalışacağıq.

– Baş məşqçi yeni transferlərlə bağlı sizə müraciət edib?
– Bununla bağlı yaxın günlərdə baş məşqçi ilə görüşəcəyik. Gedən futbolçuların yerinə yenilərini transfer etmək məcburiyyətindəyik.

– Büdcə ilə bağlı dəyişiklik var?
– Xeyr. Ciddi bir dəyişiklik yoxdur.

– "Qəbələ"nin avrokuboklarda şansını necə dəyərləndirirsiniz?
– Gücümüz, potensialımız nəyə çatırsa, onu etməyə çalışırıq. Komanda Konfrans Liqasında iştirak etməyə layiqdir. Orada necə iştirak edəcəyimizi zaman göstərəcək. Komandanın gücündən artıq nəsə edəcəyimizi deyə bilmərəm.

– Legionerlərinizə təkliflər çoxdur. Onlarla yeni müqavilə ilə bağlı danışığınız olub?
– Məndə olan məlumata görə, legionerlərimizin ilk danışıq aparacağı klub "Qəbələ"dir. Bizimlə razılaşmasalar, başqa kluba gedəcəklər.

– "Qəbələ" 2 dəfə Avropa Liqasının qrup mərhələsində iştirak edib. Buna görə də komandadan gözləntilər çoxdur. Bu barədə nə deyə bilərsiniz?
– Yəqin ki, Konfrans Liqasında bizim potensial rəqiblərimizi görmüsünüz. Başqa söz demək istəmirəm. Potensialımızdan maksimum istifadə edib ölkəmizi layiqli şəkildə təmsil etməyə çalışacağıq.

– Elmar Baxşıyev "Qəbələ"də qalacaq?
– Əlbəttə.