Azərbaycan şahmatçısı Nicat Abasov Kanadanın Toronto şəhərində təşkil olunan Namizədlər Turnirində bu gün növbəti görüşünü keçirəcək.

Prosport.Az xəbər verir ki, VI turda Rameşbabu Praqnanandhaya uduzan 28 yaşlı qrossmeyster VII turda Hindistan təmsilçisi Vidit Santoş ilə münasibətləri aydınlaşdıracaq.

Milli üzvü ağ fiqurlarla oynayacaq. Qarşılaşma Bakı vaxtı ilə saat 22:30-da başlayacaq. N.Abasov 6 turdan sonra 1,5 xalla Əlirza Firuzca ilə birgə 7-8-ci yerləri bölüşdürür.

Bu gün həmçinin Əlirza Firuzca (Fransa) – Dommaracu Qukeş (Hindistan), Hikaru Nakamura (ABŞ) – Yan Nepomnyaşşi (FIDE), Fabiano Karuana (ABŞ) – Rameşbabu Praqnanandha (Hindistan) görüşləri baş tutacaq.

Namizədlər Turniri aprelin 22-də başa çatacaq. 8 şahmatçının 2 dövrədən ibarət mübarizəsində 1-ci olan qrossmeyster hazırkı dünya çempionu Din Lirenlə (Çin) şahmat tacı uğrunda oynamaq hüququ əldə edəcək.

Qeyd edək ki, turnirin mükafat fondu 500 min avrodur. Qalib 48 min avro qazanacaq.