Azərbaycan şahmatçısı Nicat Abasov Kanadanın Toronto şəhərində keçirilən Namizədlər Turnirində bu gün növbəti görüşünü keçirəcək.

Prosport.Az xəbər verir ki, 28 yaşlı qrossmeyster II turda ABŞ təmsilçisi Fabiano Karuana ilə üz-üzə gələcək.

O, Bakıda keçirilmiş Dünya Kubokunda 3-cü yer uğrunda uduzduğu rəqibi ilə qara fiqurlarla oynayacaq. Qarşılaşma Bakı vaxtı ilə saat 22:30-da start götürəcək. Abasov ilk turda rusiyalı Yan Nepomnyaşşi ilə, Karuana isə ABŞ-nin digər şahmatçısı Hikaru Nakamura ilə heç-heçə edib – 0,5:0,5.

Bu gün həmçinin Hikaru Nakamura – Santoş Vidit (Hindistan), Rameşbabu Praqnananza – Dommaracu Qukeş (hər ikisi Hindistan), Yan Nepomnyaşşi (FIDE) – Əlireza Firuzca (Fransa) görüşləri də baş tutacaq.

Qeyd edək ki, yarış aprelin 22-də başa çatacaq. 8 şahmatçının 2 dövrədən ibarət mübarizəsində 1-ci olan qrossmeyster hazırkı dünya çempionu Din Lirenlə (Çin) şahmat tacı uğrunda oynamaq hüququ əldə edəcək.