Azərbaycanın MMA idmançısı Tofiq Musayevin döyüşü ləğv olunmayacaq.

Prosport.Az-ın xəbərinə görə, onun martın 22-də Böyük Britaniyanın (Şimali İrlandiyanın) Belfast şəhərində "Bellator 302" turnirində keçirəcəyi döyüş baş tutacaq.

34 yaşlı kunq-fu üzrə dünya çempionumuz bu barədə saytımıza bunları bildirib: "Bəli, döyüşə gedəcəyəm. Məşqçi kimi ya Mehman Məmmədovun, ya da uşaqlardan birinin köməyindən istifadə edəcəyəm".

Onun rəqibi ingiltərəli Alfi Deyvis "Balta adam" ləqəbi ilə tanınır. 32 yaşlı idmançı indiyədək 16 döyüşdə qalib gəlib, 4-də məğlub olub, 1 görüşdə isə qalib müəyyənləşməyib. Musayev isə 22 döyüşdə qalib gəlib, 5-də məğlub olub.

Qeyd edək ki, Tofiq Musayevin şəxsi məşqçisi Ruslan Əfəndiyev ötən ilin noyabrında Həsən Əzizov adlı şəxslə yaşadığı konfliktə görə həbsdədir. Bu səbəbdən də məşqçisiz qalmış Tofiqin döyüşünün ləğv oluna biləcəyi ehtimal edilirdi.