"Qarabağ"ın daha bir komandası Belarusun paytaxtı Minskdə təşkil olunan "Naşe Buduşşee" ("Bizim gələcəyimiz") adlı turnirdə iştirak edəcək.

Prosport.Az-ın xəbərinə görə, bu, Elşad Xudadatovun baş məşqçisi olduğu "Qarabağ"ın 13 yaşadək komandasıdır.

AFFA U-13 Liqasında lider olan bu komandanın rəqibləri də artıq bəllidir. "Qarabağ"ın bu gün atılan püşkatmadan sonra A qrupunda mübarizə aparacağı məlum olub.

Rəqiblər "Kalininqrad" (Rusiya), Yuri Puntus Futbol Məktəbi (Minsk, Belarus) və "Çertanovo-Severnoe" (Moskva, Rusiya) olacaq. Bu turnirdə "Baltika", BATE, "Minsk" kimi komandalar da mübarizə aparır. Turnir 13-16 mart tarixlərində keçiriləcək.

Xatırladaq ki, "Qarabağ"ın U-14 komandası da 18-21 mart tarixlərində bu turnirdə mübarizə aparacaq. Daha əvvəl "Qarabağ"ın U-15 komandası 7-10 fevral tarixlərində bu yarışda iştirak edərək 5-ci yeri tutub.