"Şamaxı"dan ayrıldıqdan sonra I Liqa klubundan təklifim vardı. Sadəcə, orada perspektiv görmədim deyə, onu seçmədim. Premyer Liqadan isə köməkçi kimi təklifim vardı, ancaq bəzi səbəblərdən o da alınmadı. Sonra "Qarabağ" Futbol Akademiyasının koordinatoru Aftandil Hacıyev zəng vurub dedi ki, çox istərdim bizimlə işləyəsən, heç olmasa yayadək bizimlə ol. Ona görə də razılıq verdim. Amma böyük komandalardan təklif olarsa, çempionat başa çatdıqdan sonra ayrılmağıma imkan yaradılacaq".
Bunu Prosport.Az saytına açıqlamasında "Qarabağ"ın 15 yaşadək komandasının (U-15) baş məşqçisi Vüqar Əsgərli deyib.
38 yaşlı məşqçi "Qarabağ"ın ona yad komanda olmadığını bildirib: "2017 və 2018-ci illərdə "Qarabağ"ın U-17 və U-19 komandalarında işləmişəm. Əvvəl U-17-də ispaniyalı Pablo Ximenesin, daha sonra U-19-da Rəşad Sadıqovun köməkçisi işləmişəm. Həmin il əsas komanda UEFA Çempionlar Liqasının qrup mərhələsinə düşdüyündən, "Qarabağ"ın U-19-u da UEFA-nın Gənclər Liqasında mübarizə aparırdı. Amma Roma səfərinə gedə bilməmişdim. Bu da həmin vaxt həm də U-19 qızlar və qadınlar millimizi çalışdırmağımla bağlı idi. Həmin vaxt Avropa çempionatının seçmə mərhələsində oyunumuz vardı".
V.Əsgərli I Liqa klubu "Şamaxı"dan sonra aşağı yaş qrupunda baş məşqçilik etməyin onun üçün çətin olmayacağını sözlərinə əlavə edib: "Azyaşlı futbolçularla işləməkdə heç bir çətinliyim yoxdur. Sözün düzü, hələ məşqə başlamamışam, sabahdan "Sərhədçi" İdman Mərkəzində məşqlərə başlayırıq (müsahibə dünən götürülüb – red.). Komandanın 1 məşqinə və "Neftçi" ilə yoxlama oyununa kənardan baxmışam. Düzdür, böyük komandalardan fərqli olaraq, uşaqlarda psixologiya başqa cür olur. Uşaqlarla görüşüb danışmışıq. Maşallah, artıq hamısı böyük kişidir".
Hazırda "Qarabağ"ın U-15 komandası AFFA-nın keçirdiyi çempionatın vahid lideridir. Yeni baş məşqçinin sözlərinə görə, əvvəl onun "Qarabağ" U-19-na keçməsi söhbəti varmış: "Aftandil müəllim məni çağıranda dedi ki, bizə nəticə önəmli deyil, uşaqları inkişaf etdirmək lazımdır. Əslində "Qarabağ"ın U-19 komandasına da keçə bilərdim. Amma U-15-i təklif etdi. Mən də razılaşdım ki, "Qarabağ"ın ən yaxşı komandasıdır və bu qrupla işləməyə dəyər. Özümlə də "Şamaxı"da mənimlə işləyən analitik məşqçi İlqar Novruzovu bura gətirmişəm. "Qarabağ" kimi klubda işləmək böyük şərəfdir".
Vüqar Əsgərli onu da bildirib ki, 7-10 fevral tarixlərində Belarusun paytaxtı Minskdə keçiriləcək "Bizim gələcəyimiz" adlı beynəlxalq turnirə yollanmazdan öncə rəsmi oyun keçirəcəklər: "Fevralın 1-də "Kəpəz"lə çempionat oyunumuz var. Ondan sonra Minskə beynəlxalq turnirə yola düşəcəyik.
Qeyd edək ki, "Qarabağ"ın U-15 komandası qış fasiləsində yanvarın 18-də "Səbail"i 3:0, ayın 21-də "Zirə"ni 3:2 məğlub edib. Hər iki oyun əvvəlki baş məşqçi Rakif Əliyevin vaxtında olub. Komanda yanvarın 24-də isə köməkçi məşqçi Elmir Alıyev rəhbərliyi altında "Neftçi" ilə 2:2 oynayıb.