Yaponiyanın "Rayzin" təşkilatının növbəti turnirində 2 azərbaycanlı MMA idmançısı döyüşəcək.

Prosport.Az-ın xəbərinə görə, bunlar Vüqar Kərəmovla Tural Rəhimovdur.

Fevralın 24-də Yaponiyanın Saqa şəhərində keçiriləcək "Rizin Landmark 8" adlanan turnirdə Vüqarın 66 kq çəki dərəcəsində rəqibi Kazumasa Macima olacaq. Tural isə bu dəfə 71 kq-da yox, 66 kq-da mübarizə aparacaq. Onun rəqibi də yerli idmançı – yaponiyalı olacaq. Bu, "Hanzo" ləqəbli Hirosiqe Tanakadır.

Bakıdakı turnirdə qalib gələn 2 azərbaycanlıdan biri olan Mehman Məmmədov isə martın 23-də Yaponiyanın Kobe şəhərində keçiriləcək "Rizin 46"da döyüşəcək. Tofiq Musayev isə əvvəldən də bəlli olduğu kimi, yoluna "Bellator"da davam edəcək.

Qeyd edək ki, noyabrın 4-də Bakıda keçirilmiş "Rizin Landmark 7" turnirində Vüqar Kərəmov yaponiyalı Çihiro Suzukiyə uduzaraq çempionluq kəmərini müdafiə edə bilməyib. Tural Rəhimov isə 21-ci saniyədə Kim Kyunq-pyo tərəfindən nokauta düşüb.