"FIDE tərəfindən Namizədlər Turniri yaranandan Azərbaycan şahmatçıları əksər yarışlarda iştirak edib”.

Prosport.Az xəbər verir ki, bunu Azərbaycan Şahmat Federasiyasının (AŞF) prezidenti Mahir Məmmədov deyib.

O, AŞF-nin rəsmi saytına bildirib ki, Nicat Abasov Namizədlər Turnirinə düşməyi haqq edib: “Mütəmadi olaraq Şəhriyar Məmmədyarov və Teymur Rəcəbov Namizədlər Turnirində mübarizə aparıb, hətta qalib gəlməyə yaxın olub. Şəhriyar Berlində qalibiyyətin bir addımlığında olduğu halda 2-ci yeri tutdu. Teymur Madrid şəhərindəki turniri 3-cü yerdə başa vurdu. Bu yarışdan sonra Maqnus Karlsen dünya çempionu titulunu qorumaqdan imtina etdi və Namizədlər Turnirində ilk 2 yeri tutan şahmatçılar çempionluq uğrunda mübarizə apardı. Bu il növbəti dəfə Azərbaycan şahmatçısı Namizədlər Turnirində yarışacaq. Nicat Abasov Dünya Kubokundakı çıxışıyla mötəbər turnirdə iştiraka layiq olduğunu göstərdi. Karlsen imtina etmədən öncə belə, Nicatın bu yarışda iştirakı haqq etdiyini düşünürdüm. Yadınızdadırsa, Dünya Kubokunda 3-cü yer uğrunda görüşün ilk partiyasında Nicat Fabiano Karuanaya qalib gəldi, sonradan təzyiqə davam gətirə bilmədi və 3-cü yerin bir addımlığında dayandı”.

Mahir Məmmədovun sözlərinə görə, Nicat Abasovun hazırlığıya bağlı xüsusi proqramın tərtib edilib: “AŞF ilə birgə hazıqlıq planı tərtib olunub. Nicatın yarışa layiqincə hazırlaşması üçün proqram üzrə bütün işlər görülür”.

Qeyd edək ki, Namizədlər Turniri 2-25 apreldə Kanadanın Toronto şəhərində keçiriləcək.