Bu gün ölkəmizdə Yaponiyanın məşhur "Rizin" döyüş təşkilatının MMA yarışı keçirilir.

Prosport.Az-ın xəbərinə görə, Milli Gimnastika Arenasında keçirilən "Rizin Landmark 7" turniri Azərbaycan üçün 3 ilklə yadda qalacaq. Həmin ilkləri təqdim edirik:

1. 2015-ci ildən fəaliyyət göstərən "Rizin"in bir turniri ilk dəfə Yaponiyada yox, ölkə xaricində keçiriləcək. İlk xarici ölkə kimi isə Azərbaycan seçilib. Bu da səbəbsiz deyil. Tofiq Musayev 2019-cu ildə turnirin Qran-prisinin qalibi olub. Vüqar Kərəmov isə bu il iyulun 30-da turnirin kəmərinə sahib çıxıb.

2. İlk dəfə yarış kikboksinqdə olduğu kimi rinqdə yox, MMA-ya xas oktaqonda keçiriləcək. Bu ilk də Azərbaycanda gerçəkləşir.

3. İlk dəfə "Rizin"in bir turnirində bu qədər sayda azərbaycanlı idmançı yarışacaq. İndiyədək maksimum 2 idmançımız bir turnirdə mübarizə aparıbsa, bu dəfə say 5-dir. Belə ki, Tural Rəhimov, Mehman Məmmədov və Nəriman Abbasov "Rizin"də debütünü məhz Bakıda reallaşdıracaq.

Qeyd edək ki, 10 MMA döyüşü nəzərdə tutulub. Sıra ilə onları təqdim edirik:

93 kq. Həsən Mejiyev (Latviya) – Konstantin Merkulov (Qazaxıstan)
120 kq. Kventin Dominqos (Portuqaliya) – Şota Betlemidze (Gürcüstan)
71 kq. İliyar Asxanov (Qazaxıstan) – Vladislav Rudnyev (Ukrayna)
66 kq. Jores Dea (Seneqal) – İlham Nazimov (Özbəkistan)
51 kq. Anastasiya Svetkivskaya (Ukrayna) – Fəridə Abduyeva (Qırğızıstan)

71 kq. Tural Rəhimov (Azərbaycan) – Kim Kyunq-pyo (Cənubi Koreya)
60 kq. Mehman Məmmədov (Azərbaycan) – Fərit Göktəpə (Türkiyə)
71 kq. Nəriman Abbasov (Azərbaycan) – Əli Əbdülxaliqov (Rusiya)
71 kq. Tofiq Musayev (Azərbaycan) – Koci Takeda (Yaponiya)
66 kq. Vüqar Kərəmov (Azərbaycan) – Çihiro Suzuki (Yaponiya) – kəməri müdafiə döyüşü

Həmçinin yaponiyalı kikboksçular – Ryusel Aşizava ilə keçmiş K-1 çempionu Kouzi arasında döyüş nəzərdə tutulub.

Səbuhi Musa