Bu gün Yaponiyanın Rayzin Döyüş Federasiyasının Bakıda keçiriləcək "Landmark 7" turnirinin ilk mətbuat konfransında münaqişə yaşanıb.

Prosport.Az-ın xəbərinə görə, titul kəməri uğrunda döyüşə çıxacaq Vüqar Kərəmovla yaponiyalı Çihiro Suzuki arasında əlbəyaxa dava olub.

Belə ki, mətbuat konfransı zamanı Suzuki stolun üstünə çıxaraq döyüşə hazır olduğunu bildirib. O daha sonra Vüqarın qazandığı kəməri çiyninə qoyaraq kəmərin ona məxsus olduğunu bildirib.

Kərəmovun cavabı isə gecikməyib. O bildirib ki, bu kəməri ancaq yuxusunda görə bilər: "O bu kəmərlə yalnız şəkil çəkdirə bilər".

Daha sonra "feys-tu-feys" mərasimində idmançılar əlbəyaxa olub. Onları təşkilatçılar ayırıb.

Qeyd edək ki, Vüqar Kərəmov bu il Yaponiyada qazandığı "Rayzin" kəmərini müdafiə edəcək. Həmçinin, noyabrın 4-də Milli Gimnastika Arenasında keçiriləcək yarışda Tofiq Musayev, Nəriman Abbasov, Mehman Məmmədov və Tural Rəhimov da döyüşəcək.