Rüstəm Orucov Avropa Cüdo Birliyinin Atletlər Komissiyasının üzvü təyin edilib

Prosport.Az xəbər verir ki, 2016-cı il Olimpiya Oyunlarının gümüş mükafatçısı Rüstəm Orucov Avropa Cüdo Birliyinin (ACB) Atletlər Komissiyasının üzvü təyin edilib.

“ACB bundan sonrakı fəaliyyətində Atletlər Komissiyasının dəstəyini alacaq və komissiyanın üzvləri təcrübələrinə arxalanaraq idmanın müxtəlif məsələlərinə cəlb olunacaqlar”, – deyə ACB-nin rəsmi səhifəsində xorvatiyalı vitse-prezident Xrvoye Lindi bildirib.

Rüstəm Orucov Avropanın ən uğurlu və hörmətli cüdoçularından hesab olunur. O, 2017 və 2019-cu illərdəki dünya çempionatlarında gümüş medal qazanıb. 2016-cı ildə Avropa çempionatının qızıl medalını qazanıb və eyni miqyaslı yarışın 2019-cu ildə gümüş, 2017, 2020, 2022-ci illərdə bürünc mükafatçısı olub.

Qeyd edək ki, Rüstəm Orucov Milli Olimpiya Komitəsinin Atletlər Komissiyasının sədri, AMADA İdmançılar Məsləhətçi Komissiyasının üzvüdür.