"Təxminən 1 il əvvəl – oktyabrın 31-də Macarıstanın Lakitelek kəndində Dünya Pauerliftinq Alyansının (WPA) keçirdiyi dünya çempionatında ciddi zədələnmişdim. Yarışda ilk yanaşmam 310 kq olmuşdu və bu nəticəni uğurla yerinə yetirmişdim. Oturub-durma hərəkətində bu göstərici mənə dünya çempionluğu titulunu zatən vermişdi. Lakin 325 kq çəkini də qaldırmağa cəhd etdim. Onda diz bağlarım qopdu və elə həmin gecə Macarıstanda əməliyyat olundum”.

Ağır zədədən sonra pauerliftinq və benç-press üzrə Azərbaycan Kubokunda 1-ci yeri tutan Ramil Əhmədov zədədən sonra qayıdışı barədə Prosport.Az-a danışıb.

Əvvəlcə 38 yaşlı idmançı aldığı ağır zədə barədə fikirlərini bölüşüb. R. Əhmədov əməliyyatdan sonrakı çətin reabilitasiya dövründən söz açaraq qeyd edib ki, 2 aya yaxın yerimək qabiliyyətini tamamilə itirib və ayaqları gipsdə qalıb. Gips çıxarıldıqdan sonra əzələ atrofiyası səbəbindən reabilitasiya prosesinə başlanılıb: 

“İlkin bərpa dövrü Milli İdman Tibb və Reabilitasiya İnstitutunda həkim Rəşad Əhmədovun nəzarəti altında həyata keçirildi. Heç bir qurum mənə bu prosesdə maddi dəstək olmayıb. Daha sonra dostum Saleh Nəsirov tərəfindən tövsiyə olundu ki, Yeni Klinikada həkim Pərvin Əkbərovun yanında təmənnasız reabilitasiyaya başlayım. Məhz oradakı reabilitasiya və idman hərəkətləri sayəsində yenidən daha yaxşı formada yeriməyə başladım”.

O, çətin günlərdə ona dayaq olan şəxslərə minnətdarlığını bildirib: “Bu dönəmdə yanımda olan komanda yoldaşlarım – Vüqar Namazov, Namiq Nuriyev, İlkin Namazov və Toğrul Əmirli mənə böyük dəstək göstərdilər. Məşqlərimdə dostum Pərviz Qasımov yaxından köməklik etdi. Heç bir maddi gəlirimin olmadığı bir vaxtda əməliyyat xərclərimi də mənə tanıyan dostlar və ətrafımdakı yoldaşlar öz aralarında pul toplayaraq ödədilər”.

Onun sözlərinə görə, köhnə idmançıların ötən ay baş tutmuş Azərbaycan Kubokuna qayıtması yarışa xüsusi bir maraq və rəngarənglik qatıb: "Bunu sorğu edib də soruşa bilərsiniz, mənim iştirakım da hamıya maraqlı gəldi. Yarışda yeni Azərbaycan rekordu da qeydə alındı. Məhəmməd Hüseynov (məşqçisi Aydın0 Hümbətov) oturub-durma hərəkətində 350 kq nəticə göstərərək yeni rekorda imza atdı. Məhəmməd də sinə əzələsindən zədə aldı. O, uzun illər mütləq qaliblər arasında 1-ci olan Razim Hüseynovu üstələyərək Azərbaycan pauerliftinqində yeni bir dönəm açdı”.

Pauerliftinqçi öz çıxışını da dəyərləndirib. O bildirib ki, 11 aylıq fasilədən sonra bu, ilk yarışı olub: "Eyni zamanda, bu federasiyada, Beynəlxalq Pauerliftinq Federasiyası (IPF) versiyası üzrə keçirilən ilk yarışım olduğu üçün daha həyəcanlı idim. Qaydalar tamamilə fərqli idi. Qaldırdığım çəkidən razı deyiləm. Çünki əvvəllər daha yaxşı nəticələrim olub. Təchizatlı şəkildə sinədən 260 kq, təchizatsız 220 kq qaldırmışam. Avropa çempionatında 215 kq-la bu hərəkətin ümumi divizionunda Avropa rekordunu yeniləmişəm. Həmin vaxt 100 kq çəki dərəcəsində çıxış edirdim. İndi isə 104-105 kq çəki kateqoriyasında 1-ci oldum. Rəqiblərim də zəif deyildi.

Bir qədər daha yaxşı hazırlıq keçə bilsəydim, nəticəm də daha yüksək olardı. Hazırlığım istədiyim səviyyədə olmadığı üçün 205 kq qaldırdım. Lakin 210-215 kq qaldırsaydım, yarışın mütləq qalibi də ola bilərdim. Nəticədə 205 kq-la mütləq qaliblər arasında 3-cü yeri tutdum".

Səbuhi Musa