15 yaşadək oğlanlardan ibarət futbol millimizin (U-15) Bakıda keçirilən dünya çempionatı və festivaldakı növbəti rəqibinin adına aydınlıq gəlib.

Prosport.Az-ın xəbərinə görə, Famil Xəlilovun komandası sabah Çili yığması ilə qarşılaşacaq.

Qeyd edək ki, komandamız bundan sonra təsnifat qrupunda 3-cü yeri tutmuş komandaların çempionluğu üçün mübarizə aparacaq. Maksimum nəticə millimizə ən yaxşı halda 65-ci yeri qazandıracaq. Millimiz qalib gəlsə, C yolunun (təsnifat qrup 3-cüləri) 1/8 finalında, məğlub olsa, 81-ci yer uğrunda mübarizə aparacaq.

Qələbə bizi Belarus – Cəbəllüttariq cütünün qalibi ilə 1/8 finala, məğlubiyyət isə həmin cütün məğlubu ilə görüşə çıxaracaq.

Xatırladaq ki, yığmamız yer aldığı sonuncu təsnifat qrupu olan AF-də Şərqi Timor millisinə 6:0, Andorraya 1:0, İsrailə 3:1 qalib gəlsə də, Avstraliyaya 1:3 və Haitiyə 0:4 uduzub. Bununla da komandamız 9 xalla qrup 3-cüsü olub.

Rəqib Çili millisi isə E təsnifat qrupunda Küveyt yığmasını 2:0, Barbadosu 8:0 məğlub edib, Tacikistanla 1:1 oynayıb, Konqoya 2:3 və İspaniyaya 2:4 uduzub. Cənubi amerikalılar 7 xalla qrupda 3-cü yeri tutub.