Çexiyanın “Slaviya Praqa” komandasının baş məşqçisi Yindrjix Trpişovski “Sabah”la Çempionlar Liqasının əsas mərhələsinin II tur oyunundan əvvəl zədəli futbolçuların vəziyyəti barədə danışıb.

Prosport.Az xəbər verir ki, çexiyalı mütəxəssis ölkə çempionatının X turunda “Zlin”i səfərdə məğlub etdikləri matçdan sonra mətbuat konfransında Daniyel Şturmu istirahət üçün meydana buraxmadıqlarını bildirib.

“Şturma istirahət verdik. Ardıcıl 4 oyunu tam keçirdikdən sonra onu bu matça gətirməyin mənası yox idi. Onu Bakıdakı oyuna hazır saxlamaq istəyirik. Oskar Kubyak da bazar ertəsi məşqlərə qoşulacaq, bəlkə, David Yurasek də. Beləliklə, seçim imkanlarımız artacaq”, – baş məşqçi qeyd edib.

Trpişovski müdafiəçi Ştepan Çalupek və yarımmüdafiəçi Pavel Kaçorun zədələri barədə də məlumat verib. Onun sözlərinə görə, Çalupek təxminən 4-5 həftə yaşıl meydanlardan kənarda qalacaq. Futbolçunun budunun arxa əzələsində yırtıq aşkarlanıb və onun növbəti milli komandaların oyunları fasiləsindən sonra məşqlərə qayıtması gözlənilir.

Kaçorun isə çiyni çıxıb. Baş məşqçi onun bərpa prosesinin nə vaxt başa çatacağı barədə dəqiq vaxt açıqlamayıb.

Qeyd edək ki, “Slaviya Praqa” oktyabrın 9-da Çexiya çempionatının X turunda səfərdə “Zlin”ə 1:0 hesabı ilə qalib gəlib. Görüşdə yeganə qolu 16-cı dəqiqədə Emmanuel Ayaosi vurub.

Praqa təmsilçisi oktyabrın 13-də Çempionlar Liqasının əsas mərhələsinin II turunda Bakıda “Sabah”ın qonağı olacaq. Qarşılaşma Bakı Olimpiya Stadionunda saat 20:45-də başlayacaq.