Avrokuboklarda debüt edəcək basketbol üzrə son Azərbaycan 3-cüsü olan "Gəncə"nin oyunlarının vaxtı tam müəyyənləşib.
Prosport.Az-ın xəbərinə görə, Sloveniya əsilli amerikalı baş məşqçi Martin Knejeviçin komandasının FIBA Avropa Kubokunun müntəzəm mövsümünün C qrupunda 2 rəqibinin bilinməsi ilə təqvimə aydınlıq gəlib.
Belə ki, Bolqarıstanın "Rilski Sportist" və Yunanıstanın "Kolossos H Hotels" komandaları FIBA Çempionlar Liqasının təsnifat mərhələsinin ilk görüşündəcə mübarizəni dayandırıb. Bu komandalar 1/8 finalda müvafiq olaraq "Rio Breoqan"a (İspaniya) 80:126 və "Biotekno Körfəz"ə (Türkiyə) 79:91 hesabı ilə uduzaraq Avropa Kubokunun C qrupunda mübarizə aparmalı olub.
Beləliklə, "Gəncə" 7 oktyabrda İstanbulda debüt edəcək. Matç Bakı vaxtı ilə saat 20:00-da başlayacaq. Gəncədə keçiriləcək ilk avrokubok matçı isə bundan 1 həftə sonraya təsadüf edəcək. "Gəncə" "Kolossos H Hotels"lə saat 19:00-da qarşılaşacaq. Ümumiyyətlə, Gəncə İdman Sarayında keçiriləcək bütün qarşılaşmaların başlanma saatı 19:00-dır.
Məşhur "Sportinq" klubu ilə dekabrın 16-dakı Lissabondakı oyun ən uzun səfər olacaq və bu matç Bakı vaxtı ilə saat 23:30-da başlayacaq. 23 dekabrda "Gəncə" – "Universitatya" oyunu ilə komandamız qrupda son oyununu keçirəcək. II mərhələyə vəsiqə qazanmaq üçün qrupda ilk 2 yerdən birini tutmaq lazımdır.
FIBA Avropa Kuboku (Müntəzəm mövsüm)
C qrupu
7 oktyabr
"Əsənlər Ərokspor" (Türkiyə) – "Gəncə"
İstanbul. Beşiktaş GAİN İdman Kompleksi
14 oktyabr
"Gəncə" – "Kolossos H Hotels" (Yunanıstan)
Gəncə İdman Sarayı
21 oktyabr
"Rilski Sportist" (Bolqarıstan) – "Gəncə"
Samokov Arenası
29 oktyabr
"Gəncə" – "Sportinq" (Portuqaliya)
Gəncə İdman Sarayı
4 noyabr
"Universitatya" (Rumıniya) – "Gəncə"
Krayova. Çoxməqsədli Zal
12 noyabr
"Gəncə" – "Əsənlər Ərokspor" (Türkiyə)
Gəncə İdman Sarayı
18 noyabr
"Kolossos H Hotels" (Yunanıstan) – "Gəncə"
Rodos (Faliraki kəndi). Kalitea İdman Sarayı
10 dekabr
"Gəncə" – "Rilski Sportist" (Bolqarıstan)
Gəncə İdman Sarayı
16 dekabr
"Sportinq" (Portuqaliya) – "Gəncə"
Lissabon. Juau Roşa adına Pavilyon
23 dekabr
"Gəncə" – "Universitatya" (Rumıniya)
Gəncə İdman Sarayı