“Real Madrid”in sabiq müdafiəçisi Roberto Karlos “Espanyol”un yarımmüdafiəçisi Aleks Kalatravanın Vinisius Juniora qarşı etdiyi hərəkətlə bağlı açıqlamasına istehza ilə münasibət bildirib.

Prosport.Az xəbər verir ki, La Liqanın II turunda keçirilən “Real Madrid” – “Espanyol” görüşünün ilk dəqiqələrində Aleks Kalatrava Vinisius Juniorun belinə ayaqla zərbə endirib.

İspan futbolçu epizodla bağlı bildirib ki, topa oynamaq istəyib, lakin topun artıq orada olmadığını gördükdə hərəkətini dayandırmağa çalışıb. Onun sözlərinə görə, hakim və VAR da bunu oyun epizodu kimi qiymətləndirib.

Roberto Karlos isə Kalatravanın açıqlamasına “O qədər rəngarəng yalan danışır ki, hətta mən də inanıram” sözləri ilə reaksiya verib.