Azərbaycan Premyer Liqasının II turunda öz meydanında “İmişli”yə 3:1 hesabı ilə qalib gələn “Zirə”nin baş məşqçisi Rəşad Sadıqov matçdan sonra keçirilən mətbuat konfransında jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə qələbəni şərh edib.

– Gərgin və maraqlı qarşılaşma izlədik. Xüsusilə ikinci hissədə çox sürətli futbol oynanıldı. Bizim üçün vacib 3 xal idi. Oyunun ssenarisi “Payde” ilə matçı xatırladırdı. Hesabda öndə olduğumuz halda real imkanları boşa verdik. Futbolçularımın göstərdiyi reaksiya məni çox razı saldı. Sona qədər inandılar, soyuqqanlılığı qoruyub əzmkar mübarizə apardılar. Hücuma çıxmağa davam etdilər və yekunda vurduğumuz qol məsələyə nöqtə qoydu. Söhbət hesabın 2:1 və ya 3:1 olmasından getmir. Hətta 2:1 ikən komandanın arxaya çəkiləcəyini düşündüm, lakin yetirmələrim müdafiəyə qapanmadı, irəli atılaraq rəqibi səhv etməyə məcbur qoydu. Sonda bizim üçün çox önəmli qələbəni təmin etdik.

– Qismət Alıyevın artıq iki oyundur ki, ehtiyatda qalmasına səbəb nədir?

— Bu, mövsümün əvvəlində planlaşdırdığımız seleksiya strategiyasının tərkib hissəsidir. Uzun illər sağ cinahda yalnız Qismət oynayırdı və zədələr zamanı əziyyət çəkirdik. Eyni vəziyyət İsa Cibrillaya da aid idi. Hazırda isə əlimizdə 3 cinah müdafiəçisi var və mövsüm ərzində rotasiyalardan istifadə edəcəyik. Qismət avrokuboklarda 4 əla oyun keçirdi, onun ehtiyatda qalması kiminsə ondan üstün olması demək deyil. Keçirilən matçlar üçün planımız belə idi. Növbəti rəqibləri təhlil edib ona uyğun qərar verəcəyik. Qismət sonradan daxil olduğu hər iki oyunda əzmkarlıq nümayiş etdirdi və komanda üçün nə dərəcədə vacib fiqur olduğunu göstərdi. Ümumiyyətlə, sezon uzundur. Keçən mövsüm bəzi mövqelərdə məcburiyyətdən orada çıxış etməyən futbolçuları oynadırdıq. İndi də heyətimiz kasaddır, yeni transferlər üzərində işləyirik.

– Yaxın günlərdə heyətə qatılması gözlənilən oyunçu var?

– Bəli, hətta şifahi razılıq əldə etdiyimiz futbolçu da var. İndi 5–6 namizədlə danışıqlar aparırıq. Gündəmdə 4–5 transfer var, amma prosesin necə yekunlaşacağını zaman göstərəcək.

— Transfer gündəmində Premyer Liqadan olan futbolçular var?

— Xeyr, danışıq apardığımız oyunçuların hamısı xarici çempionatların təmsilçiləridir.