"Sabah" basketbol klubu yeni mövsümə hazırlıq çərçivəsində Litvada təlim-məşq toplanışı keçirəcək.

Prosport.Az xəbər verir ki, toplanış avqustun 23-dən sentyabrın 14-dək davam edəcək.

Bakı təmsilçisi hazırlıq prosesində Avropa turnirlərində mübarizə aparacaq klublarla yoxlama oyunları keçirəcək.

Paytaxt təmsilçisi avqustun 26-da "Yuventus" (Litva), 29-da "Şyaulyay" (Litva), sentyabrın 3-də "London Layns" (Böyük Britaniya), 6-da isə "Jalqiris" (Litva) komandaları ilə qarşılaşacaq.

Hazırlıq prosesi sentyabrın 12–13-də Klaypeda şəhərində təşkil olunacaq Vladas Qarastas Kuboku ilə başa çatacaq. "Sabah" yarımfinalda Litvanın "Neptunas" klubu ilə üz-üzə gələcək. Turnirin digər iştirakçıları isə "Riqas Zelli" (Latviya) və "Şyaulyay" komandalarıdır.

Qeyd edək ki, "Sabah"ın yoxlama matçlarındakı rəqiblərindən "Yuventus" Çempionlar Liqasında, "Şyaulyay", "London Layns", "Neptunas" və "Riqas Zelli" Avropa Kubokunda, "Jalqiris" isə Avroliqada çıxış edəcək.