Azərbaycan millisinin 16 yaşlı basketbolçusu Emmanuel Aqbason NBA və FIBA-nın birgə həyata keçirdiyi "Basketball Without Borders" proqramının yeni qlobal mərhələsi — "BWB Next Up"a seçilib.

Prosport.Az xəbər verir ki, "BWB Next Up" ABŞ xaricindən seçilən 80 ən perspektivli gənc oğlan basketbolçunu bir araya gətirəcək. Proqram gənc istedadlara yüksək səviyyəli basketbol mühitində inkişaf etmək və dünyanın müxtəlif ölkələrindən olan həmyaşıdları ilə özlərini sınamaq imkanı yaradır.

"BWB Next Up"da ən yaxşı çıxış edən basketbolçular növbəti NBA All-Star çərçivəsində keçiriləcək BWB All-Star düşərgəsində iştirak etmək üçün seçilə biləcəklər.

Aqbason bu yay U-18 Avropa çempionatının B divizionunda 2 tarixi rekorda imza ataraq turnirin ən parlaq basketbolçularından biri olub. Gənc mərkəz oyunçusu Azərbaycanın əsas milli komandasının da heyətində çıxış edir. O, həmçinin U-20 Avropa çempionatının B divizionunun yekunlarına əsasən, FIBA-nın seçdiyi 9 basketbolçu sırasında yer alıb.