Azərbaycanın oğlanlardan ibarət basketbol millisinin mərkəz oyunçusu Emmanuel Aqbason FIBA U-18 Avropa çempionatının B divizionunda 2 tarixi rekorda imza atıb.

Prosport.Az xəbər verir ki, FIBA turnirin yekunlarına həsr etdiyi xüsusi materialda 16 yaşlı basketbolçunu yarışın ən parlaq fərdi çıxışlarından birinin müəllifi kimi təqdim edib.

Aqbason keçirdiyi 8 qarşılaşmada orta hesabla 16,4 xal, 16,6 ribaund, 1,1 məhsuldar ötürmə, 2,5 topalma və 5 blokla yadda qalıb. Onun orta effektivlik göstəricisi 30,9 olub.

Azərbaycan millisinin üzvü turniri ribaund, blok və effektivlik üzrə birinci, xal göstəricisinə görə 5-ci, topalmada isə 6-cı pillədə başa vurub.

Aqbason hər oyuna orta hesabla 16,6 ribaund toplamaqla B divizionunun tarixində bu göstərici üzrə yeni rekord müəyyənləşdirib. Əvvəlki ən yaxşı nəticə 2006-cı ildə İngiltərə millisinin basketbolçusu Den Klarka məxsus olub - 15,9 ribaund.

O, orta blok göstəricisində də turnir rekordunu yeniləyib. Aqbasonun hər oyuna 5 bloku 2011-ci ildən Slovakiya təmsilçisi Boris Boyanovskinin sahib olduğu 4,2 blokluq nəticəni geridə qoyub.

Azərbaycanlı basketbolçunun 30,9 orta effektivlik xalı isə yarış tarixinin 2-ci ən yaxşı nəticəsidir. Rekord 2011-ci ildə 32 effektivlik xalı toplayan Boyanovskiyə məxsusdur.

Aqbason Portuqaliya ilə oyunda 18 xal, 12 ribaund və 8 blok, Monteneqroya qarşı qarşılaşmada isə 21 xal, 22 ribaund və 9 blok toplayaraq iki dəfə “tripl-dabl”a yaxın olub. O, İslandiya ilə son matçda 23 xal və 23 ribaundla fərqlənib. Azərbaycan millisi turniri 16-cı pillədə başa vurub.