“Artıq 25 gündür ki, intensiv iş rejimindəyik. Heç vaxt belə rejimdə mübarizə aparmamışam. Son günlərdə güc tükənmişdi. Amma yarışa gələn şahmat həvəskarlarının dəstəyi yüksək motivasiyada mübarizə aparmağa kömək edirdi".

Prosport.Az xəbər verir ki, bunu Bakıda keçirilən şahmat üzrə Dünya Kubokunda 4-cü yeri tutan Nicat Abbasov yarışın rəsmi saytına açıqlamasında deyib.

Karyerasında ilk dəfə Dünya Kubokunda yarımfinala qədər gələn şahmatçı yorğun olduğunu etiraf edib: "Güc tükəndiyindən son oyunlarda istədiyim oyunu göstərə bilmədim. Bununla belə, böyük təcrübə qazandım. İnanıram ki, bu təcrübə qarşıdakı yarışlarda layiqli nəticələr qazanmağa kömək edəcək”.

Azərbaycan şahmatçısı ona dəstək olan insanlara təşəkkür edib: “Daim dəstək olan azarkeşlərə, şahmat ictimaiyyətinə "çox sağ ol" deyirəm. İlk dəfə belə gözəl həyəcanı hiss etdim. Növbəti yarışlarda da hamını sevindirmək üçün mübarizə aparacağam”.