Ardıcıl ikinci mövsüm FIBA Çempionlar Liqasının əsas mərhələsində çıxış edəcək Azərbaycanın "Sabah" basketbol klubunun qrup mərhələsində keçirəcəyi oyunların təqvimi müəyyənləşib.

Prosport.Az xəbər verir ki, paytaxt təmsilçisi A qrupunda ilk matçını oktyabrın 6-da səfərdə Litvanın "Ritas" (Vilnüs) komandasına qarşı keçirəcək.

Lazar Spasiçin baş məşqçisi olduğu kollektiv oktyabrın 14-də Türkiyə "Trabzonspor"unu qəbul edəcək, 27-də isə Fransanın "Nanter" klubunu sınağa çəkəcək.

Noyabrın 10-da "Trabzonspor"la səfərdə üz-üzə gələcək Azərbaycan çempionu dekabrın 9-da Fransada "Nanter"in qonağı olacaq.

Qrup mərhələsində son oyun isə dekabrın 22-də Bakıda Litvanın "Ritas" komandasına qarşı keçiriləcək.