Azərbaycan Basketbol Liqasının 2-cisi olan "Landau Layns"ın Çempionlar Liqasının (ÇL) təsnifat mərhələsindəki rəqibi VEF (Riqa) köklü klubdur.

Prosport.Az 1/8 finalda rəqib olan Latviya klubunu incələyib.

1958-ci ildə yaradılmış Riqa klubuna VEF (Dövlət Elektrotexnika Fabriki) sponsorluq edir. Bu komanda 3 dəfə – 1960, 1966 və 1991-ci illərdə SSRİ çempionatının bürünc medallarını qazanıb. Son bürünc medal onlara ilk dəfə avrokuboklarda iştirak imkanı verib. Bununla belə, 1992-ci ildə klub dağılıb. 

2007-ci ildə klub yenidən fəaliyyətini bərpa edib. Onlar bu müddətdə 12 dəfə Latviya çempionu, 4 dəfə gümüş mükafatçı olub. Bundan başqa, komanda 4 dəfə Latviya Kubokunun, 1 dəfə Baltik Basketbol Liqasının və 2 dəfə Latviya-Estoniya Liqasının qalibi adını qazanıb. 2025/26 mövsümünü Latviyada 4-cü sırada başa vurublar.

Ağ-qara komandanın baş məşqçisi Yevgeni Kosuşkindir. İyulun 2-də ona yeni köməkçilər – Martinş Zibart və Qunar Qailitis qoşulub. Son mövsüm komandada Ukrayna, ABŞ və İsveçrədən legionerlər olsa da, onlarla yollar ayrılıb.

Qeyd edək ki, VEF – "Landau Layns" oyunu 14 sentyabrda neytral meydanda – Bolqarıstanda (Samokov şəhərinin "Rilski Sportlist" komandası da burada mübarizə aparır) keçiriləcək. Qalib komanda 1/4 finalda "Opava" (Çexiya) – "Dziki" (Varşava, Polşa) cütünün qalibi ilə yarımfinala çıxmaq üçün mübarizə aparacaq. Yalnız 4 oyunun qalibi olan komanda Çempionlar Liqasında müntəzəm mövsümün F qrupuna (burada rəqiblər "Hapoel" (Holon, İsrail), "Şole Basket" (Fransa), "Spartak" (Serbiya) olacaq) vəsiqə qazanacaq. Uduzan komanda isə FIBA Avropa Kubokunun müntəzəm mövsümündə mübarizəsini davam etdirəcək.

Səbuhi Musa