Bosniya və Herseqovinanın paytaxtı Sarayevo şəhərində keçirilən boks üzrə Olimpiya ümidləri turnirinə yekun vurulub.

Prosport.Az xəbər verir ki, yarışda 2 yaş kateqoriyası üzrə 13 idmançı ilə təmsil olunan Azərbaycan millisi ümumilikdə 12 medal qazanıb. Komandamızın aktivinə 7 qızıl, 3 gümüş və 2 bürünc medal yazılıb.

U-19 yaş qrupunda Əli Əliyev (50 kq), Nihat Qasımov (55 kq), Əli Baxışov (60 kq) və Səftər Məmmədzadə (+90 kq) qızıl medala sahib olublar. Gülər Hüseynova (54 kq) yarışı gümüş medalla başa vurub. Şahin Aslanov (65 kq) və Rza Rzayev (70 kq) isə bürünc medal əldə ediblər.

U-17 yaş qrupunda Aysel Fərəcova (48 kq), Səma Abbasova (66 kq) və Xumar Cəfərli (80 kq) fəxri kürsünün ən yüksək pilləsinə qalxıblar. Aydan İsmayıllı (48 kq) və Fatimə Məmmədli (50 kq) isə gümüş medala layiq görülüblər.

Beləliklə, Azərbaycan millisi turniri 7 qızıl, 3 gümüş və 2 bürünc olmaqla ümumilikdə 12 medalla başa vurub.