"İlk 2 oyun bizim üçün kifayət qədər çətin keçdi. Təəssüf ki, istədiyimiz oyunu nümayiş etdirə bilmədik. Bunun əsas səbəblərindən biri rəqiblərimizin həm boyca, həm də fiziki cəhətdən üstün olmaları idi".

Prosport.Az xəbər verir ki, bu sözləri Azərbaycanın kişi voleybolçulardan ibarət millisinin kapitanı Vüqar Bayramov deyib.

O, yığmanı qarşıda daha 4 vacib oyunun gözlədiyini bildirib: "Hazırda səhvlərimizi və çatışmazlıqlarımızı diqqətlə təhlil edir, növbəti görüşlərə daha yaxşı hazırlaşmaq üçün intensiv çalışırıq. İnanıram ki, qarşıdakı oyunlarda daha inamlı çıxış edəcək, daha keyfiyyətli voleybol göstərəcək və komandamızın əsl potensialını ortaya qoya biləcəyik".

Qeyd edək ki, komanda Avropa Liqasında keçirdiyi ilk 2 matçda Yunanıstan və İsveçə 0:3 hesabı ilə məğlub olub.