"Qarabağ"ı "FK Robinstayn" Xeyriyyə Turnirində görməkdən çox məmnun olduq”. 

Bunu Prosport.Az-ın Niderlanda ezam olunmuş əməkdaşına müsahibəsində Dörne kəndində keçirilən Charity Cup (Xeyriyyə Kuboku) turnirinin rəhbəri Peter fan Busl (Peter van Bussel) deyib.

O, turnirdə 9-cu yer tutan “Qarabağ”ın 16 yaşadək komandası (U-16) haqqında bu sözləri bildirib: “Niderlandlılar üçün "Qarabağ" bəlkə də hələlik kifayət qədər tanınmayan bir klubdur. Amma düşünürük ki, onlar turnirimiz üçün əsl dəyər idilər. Təkcə ona görə yox ki, onlar artıq Çempionlar Liqasında "Ayaks"a qarşı oynamış Azərbaycanın ən böyük klubudur, həm də ona görə ki, "Qarabağ"ın səfəri "FK Robinstayn"ın missiyası ilə uyğun gəlir: uşaqlara ömürlük unudulmaz futbol təcrübəsi verirlər. "Qarabağ" oyunçuları üçün bu turnir unikal bir təcrübə idi, çünki onlar Niderland və Belçika klublarına qarşı oynaya bildilər, Almaniya (Dortmund “Borusiya”sı) və Fransanın (“Lill”) klublarını bu turnirdə gördülər”.

O daha sonra 4-cü dəfə keçirilən turnirdə missiyalarından və “Qarabağ”la birgə əməkdaşlıqdan danışıb: “Bu mövsüm "FK Robinstayn" 200-dən çox uşağın futbol arzusunu gerçəkləşdirib: Niderlandda, eləcə də "Real" (Madrid), "Mançester Siti" və digər klublarda. Uşaqlar öz futbol qəhrəmanları ilə görüşüb və stadionda onların canlı oyunlarını izləyiblər. Bu onlar üçün çox şey ifadə edir və xəstəlik, əlillik, itki, travma və ya hər hansı digər səbəbdən həyatlarının çətin anlarında onlara çox sevinc, güc və ümid verir.

Xeyriyyə Fondu olaraq bizim üçün “Qarabağ”la əlaqə sadəcə turnirdə iştirakdan daha çox şey ifadə edir. Biz həqiqətən də klubla əlaqə qurmaq və gələcək üçün sıx birlik yaratmaq istəyirik. Nə vaxtsa “Qarabağ"la və ya Qarabağda bu idman növü üçün xüsusi bir an yaşamağa layiq olan uşaqlarla futbol arzusunu gerçəkləşdirə bilsək, çox yaxşı olardı. Ona görə də bir-birimizlə əlaqə saxlayaq və uşaqların həyatına futbol sehri qataq..."

Səbuhi Musa
Niderland