Bakıda keçirilən şahmat üzrə Dünya Kubokunda Azərbaycan şahmatçılarından Teymur Rəcəbovla Ülviyyə Fətəliyeva adını III mərhələyə yazdırıb.

Prosport.Az xəbər verir ki, Teymur Rəcəbov macar Viktor Erdöşü, Ülviyyə Fətəliyeva isə Polşa təmsilçisi Monika Soçkonu üstələyib.

Dünya Kubokunda gözlənilməz nəticə Tin Jinqao (Sinqapur) – Şəhriyar Məmmədyarov (Azərbaycan) partiyasında qeydə alınıb. Ağ fiqurlarla çox diqqətli oyun sərgiləyən Tin Jinqao cavab matçında Ş.Məmmədyarov üzərində qələbə qazanıb. 1,5:0,5 hesablı nəticə Sinqapur şahmatçısını növbəti mərhələyə çıxarıb. Şəhriyar Məmmədyarov isə yarışla erkən mərhələdə vidalaşıb.

Vüqar Əsədli FIDE təmsilçisi Yan Nepomnyaşi ilə görüşdə heç-heçəyə razılaşıb. İlk partiyada qələbə qazanan Y.Nepomnyaşi III mərhələyə adlayıb. Misrəddin İsgəndərov Hindistan şahmatçısı Domaracu Qukeşə hər iki partiyada uduzmaqla yarışdan kənarda qalıb. Aydın Süleymanlı və Vasif Durarbəyli isə müvafiq olaraq Parham Maqsudlu (İran) və Jül Musara (Fransa) qarşı görüşlərdə iki partiyanın ümumi nəticəsində məğlubiyyət acısı yaşayıb.

Qadınların yarışında Günay Məmmədzadə, Gövhər Beydullayeva və Gülnar Məmmədova Dünya Kubokunun 1/32 finalında mübarizəni dayandırıb.

Azərbaycan şahmatçılarından Nicat Abbasov, Eltac Səfərli, Rauf Məmmədov, Qədir Hüseynov və Abdulla Qədimbəyli hər 2 görüşdə heç-heçə oynadığından, həlledici mərhələ sayılan tay-brekdə çıxış edəcək.