"Sabah" Azərbaycan Basketbol Liqasının final seriyasının 2-ci oyununda "Abşeron Layns"ı 112:84 hesabı ilə məğlub edib.

Prosport.Az xəbər verir ki, matçdan sonra hər iki komandanın baş məşqçisi fikirlərini bölüşüb.

Rimas Kurtinaytis ("Sabah"): "Ardıcıl 2 qələbəyə baxmayaraq pley-offda hər oyuna seriyadakı hesabı unudub çıxmaq lazımdır. Bizim üçün gözəl başlanğıc oldu. Amma seriya davam edir. 3-cü oyuna rahat çıxsaq, bu, bizim ziyanımıza işləyə bilər. Bu 2 qələbə başlanğıcdır, sonluq deyil. Rəqibin heyətdəki problemlərinə baxmayaraq sona qədər mübarizə aparması təqdirəlayiqdir".

Ərhan Tokər ("Abşeron Layns"): "Vəziyyət bəlli idi. Ceylon Şou və  Saadettin Donat zədəli idi. Orelik Gediminas da ötən oyunu xəstə olmasına baxmayaraq oynamışdı, amma matçdan sonra onu xəstəxanaya aparmalı olduq. Vəziyyəti pisləşmişdi. Bu gün oyunun gedişində də Nicat Məmmədli xəstəxanaya getdi. Hələlik dəqiq bilmirəm, amma burnu qırılmış ola bilər. Bir sözlə, çox kasad heyətlə çıxış etmək məcburiyyətində idik. Bundan başqa, mərkəz mövqedə oynaya biləcək basketbolçumuz yox idi. Basketbolçularım çox böyük mübarizlik göstərdilər. Onlarla qürur duyuram. Bu şərtlərdə "Sabah" kimi güclü kluba qarşı oynamaq çox çətindir. Həm heyətləri tamdır, həm də ehtiyatda rotasiya üçün əlavə oyunçuları var. Rəqibi qələbə münasibəti ilə təbrik edirəm. Görünən odur ki, gələn oyunda da Saadettin Donat, Ceylon Şou, Nicat Məmmədli və Orelik Gediminassız mübarizə aparmalı olacağıq. Görək necə olacaq. Əlimizdən gələnin ən yaxşısını edəcəyik. Bir daha rəqib "Sabah"ı qələbə münasibəti ilə təbrik edirəm.

Xatırladaq ki, "Sabah" ilk görüşdə də rəqibini üstələyib - 98:93. Final seriyasında 3 qələbəyə ən tez çatan kollektiv Azərbaycan Basketbol Liqasının qalibi olacaq. Komandalar arasında 3-cü oyun mayın 5-ə keçiriləcək.