Azərbaycanın kişi şahmatçıları fərdi Avropa çempionatında 2 medal qazanıb.

Prosport.Az xəbər verir ki, Polşanın Katovitse şəhərində təşkil edilən şəxsi Avropa çempionatında son turun partiyaları oynanılıb. 

XI turda Azərbaycan şahmatçılarının duelində Aydın Süleymanlı ilə Məhəmməd Muradlı heç-heçə oynayıb. Son tura lider kimi qədəm qoyan Nicat Abasov ağ fiqurlarla Rumıniya təmsilçisi Daniel Boqdanla bərabərliyə razılaşaraq yarım xalla kifayətlənib.

Eyni xala malik Ukrayna şahmatçısı Roman Deqityarov son turda ispan David Anton Qixaronu məğlub edərək Avropa çempionu olub. 11 turdan sonra hərəyə 8,5 xal toplayan Azərbaycan şahmatçıları 2-4-cü yerləri bölüşdürüb. Nicat Abasov Avropa çempionatını 2-ci, Aydın Süleymanlı isə 3-cü pillədə başa vurub. Son Azərbaycan çempionu Məhəmməd Muradlı qitə çempionatında 4-cü olub. Hər 3 şahmatçı gələn il keçiriləcək Dünya Kubokuna vəsiqə qazanıb.

Beləliklə 43 ölkənin təmsil olunduğu Avropa çempionatında 2 medal Azərbaycan şahmatçılarına təqdim olunacaq. Yarışın yekunlarına əsasən ilk "4-lük"də 3 Azərbaycan təmsilçisi qərarlaşıb.

Xatırladaq ki, fərdi Avropa çempionatı 2000-ci ildən keçirilir. Azərbaycana kişi şahmatçıların qitə çempionatında yeganə medalı 2005-ci ildə 2-ci yeri tutan Teymur Rəcəbov qazandırıb.