"Neftçi" basketbol komandası Azərbaycan Basketbol Liqasının 1/4 final mərhələsinin 3-cü matçında NTD-yə qalib gəlib – 102:97.

Prosport.Az hər iki komandanın məşqçisinin fikirlərini təqdim edir:

Tahir Baxşıyev (NTD): "Bu gün biz qələbə qazana bilərdik. Yarımfinala yüksəlmək üçün əla şansımız var idi. Amma oyunun sonunda çox zəif çıxış etdik. Xüsusilə ribaundlarda zəif təsir bağışladıq. Bu çox vacibdir. Yenə də növbəti mərhələyə keçmək üçün bütün imkanlarımız var idi, lakin onları dəyərləndirə bilmədik. Mövsümə ümumi baxsaq, əsas problem komandamızın çox gec formalaşması oldu. Mövsüm ərzində heyətdə çox dəyişikliklər baş verdi. Əgər bu heyət mövsümün əvvəlindən olsaydı, nəticə tam fərqli ola bilərdi. Oyundan-oyuna artırırdıq, amma istədiyimiz nəticəni əldə edə bilmədik. Düşünürəm ki, növbəti mövsüm daha uğurlu olacaq".

Daviti Çivçivadze ("Neftçi"nin məşqçisi): “Neftçi” İdman Klubunun bütün üzvlərini bu qələbə münasibətilə təbrik edirəm! Qarşılaşdığımız çətinliklərə baxmayaraq, oyunçularım böyük xarakter nümayiş etdirdi və qələbəni qazanmağa nail oldular. Legioner oyunçularımız bu oyunda öz imkanlarının son həddinə qədər mübarizə apardı. Bu görüş həm də meydanda yerli oyunçulara güvənməyin və onlardan istifadə etməyin nə qədər vacib olduğunu göstərdi. Hər bir oyunçuma göstərdiyi zəhmət və fədakarlığa görə təşəkkür edirəm. Eyni zamanda, NTD-ni də xüsusi qeyd etmək istəyirəm. Onlar çox ciddi rəqib oldular və oyunboyu bizi maksimum səviyyədə mübarizəyə məcbur etdilər. Onlara gələcəkdə uğurlar arzulayıram. Azarkeşlərimizə isə xüsusi təşəkkür edirəm. Onların möhtəşəm dəstəyi həqiqətən bizim üçün fərq yaratdı. İndi diqqətimizi yarımfinal mərhələsinə yönəldəcəyik və orada ən yaxşı çıxışımızı göstərməyə çalışacağıq".

Qeyd edək ki, "Neftçi" yarımfinalda "Şəki"yə hər iki matçda qalib gəlmiş "Abşeron Layns"la qarşılaşacaq. Yarımfinal mərhələsi 23 apreldə baş tutacaq.