Polşanın Katovitse şəhərində təşkil olunan şahmat üzrə fərdi Avropa çempionatında X turun partiyaları baş tutub.

Prosport.Az xəbər verir ki, hesabat turunda qitə birinciliyinin liderləri arasında baş tutan qarşılaşmada qalib müəyyənləşməyib.

Azərbaycan şahmatçısı Nicat Abasov ispaniyalı David Anton Qixaro ilə heç-heçə edib. Digər təmsilçimiz Aydın Süleymanlı qara fiqurlarla litvalı Valeri Kazakovskini məğlubiyyətə uğradıb. Son ölkə çempionu Məhəmməd Muradlı isə ağ fiqurlarla Latviya idmançısı Nikita Meşkovu üstələyib.

10 turdan sonra turnir cədvəlinin ilk "5-liy"ində 3 Azərbaycan şahmatçısı qərarlaşıb. Hərəyə 8 xal toplayan N.Abasovla A.Süleymanlı 1-2-ci yerləri bölüşür. Eyni xala malik M.Muradlı isə əlavə göstəricilərə görə 5-cidir.

Qeyd edək ki, bu gün keçiriləcək sonuncu turda Aydın Süleymanlı ağ fiqurlarla Məhəmməd Muradlıya qarşı mübarizə aparacaq. Nicat Abasov isə Rumıniya təmsilçisi Daniel Boqdanla üz-üzə gələcək.