"Oyuna yaxşı başladıq. Meydançada bərabər mübarizə gedirdi".

Prosport.Az xəbər verir ki, bu sözləri NTD komandasının baş məşqçisi Tahir Baxşıyev Azərbaycan Basketbol Liqasının 1/4 final mərhələsinin 2-ci oyununda "Neftçi"yə 99:119 hesablı məğlubiyyətdən sonra deyib.

Mütəxəssis rəqibin güclü olduğunu bildirib: "Elə anlar oldu ki, oyunu öz xeyrimizə çevirə bilərdik. Amma "Neftçi" güclü komandadır. Bu gün onların 3 xallıq atışları alındı və dəqiqlik faizi təxminən 50 oldu. Belə statistika göstərən komandaya qalib gəlmək çətindir. Rəqibi qələbə münasibətilə təbrik edirəm. Qarşıda 3-cü oyun var. Hazırlaşacağıq. Qələbəni daha çox istəyən komanda yarımfinala adlayacaq".

Qeyd edək ki, NTD ilk dueldə qalib gəldiyi (97:94) üçün yarımfinala adlayan tərəf komandalar arasında keçiriləcək 3-cü görüşdə müəyyənləşəcək.