"Qələbə qazansaq da, mənim üçün ilk növbədə nümayiş etdirdiyimiz oyunun keyfiyyəti önəmlidir. Bəzi məqamlarda hesabın gətirdiyi rahatlıq hissi məni qane etmədi".

Prosport.Az xəbər verir ki, bu sözləri "Sabah"ın baş məşqçisi Rimas Kurtinaytis Azərbaycan Basketbol Liqasının 1/4 final mərhələsində "Naxçıvan"a 106:74 hesabı ilə qalib gəldikləri oyundan sonra deyib.

Litvalı mütəxəssis bildirib ki, pley-off liqanın ən vacib hissəsi olduğu üçün bu mərhələdə bütün çatışmazlıqları minimuma endirmək lazımdır: "Burada cəmi bir neçə dəqiqə yaxşı oyun nümayiş etdirməsən, hər şey sənin əleyhinə çevrilə bilər. Bu baxımdan maksimum diqqətli olmalıyıq".

O, Emmanuel Aqbasonun Gənclər Çempionlar Liqasında rəmzi "5-lik"də yer almasına da münasibət bildirib: "Bu, təbii ki, məşqçi kimi məni çox sevindirdi. Düşünürəm ki, əsas komanda ilə mütəmadi məşq etməsi bu turnirdə çıxışına müsbət təsir göstərdi. İnanıram ki, bundan sonra da karyerası yüksələn xətt üzrə inkişaf edəcək".