"Abşeron Layns" Azərbaycan Basketbol Liqasının 1/4 final mərhələsinin ilk oyununda "Şəki"yə 109:78 hesabı ilə qalib gəlib.

Prosport.Az xəbər verir ki, matçdan sonra hər iki komandanın baş məşqçisi fikirlərini bölüşüb.

Ərhan Tokər ("Abşeron Layns"): "Matça yaxşı müdafiə oyunu ilə start verdik, amma hücumda yaxşı deyildik. Sonra hücumda da oyunumuzu yaxşılaşdırdıq. İlk oyunda qələbə istəyimiz çox idi. Çünki kubokda "Şəki"yə məğlub olmuşduq.  Bütün oyunçular bu matça çox ciddi yanaşırdılar. Həm yaxşı hazırlaşmışdılar, həm də yaxşı mübarizə apardılar. Rəqib də yaxşı oyun sərgilədi. Onlara da təşəkkür edirəm. İndi Şəkidə keçiriləcək oyunu düşünürük. "Play-off"da oynayan bütün komandalara uğurlar arzu edirəm".

Bedri Meriç ("Şəki"): "Abşeron Layns”ı qələbə münasibətilə təbrik edirəm. Hələ cavab oyunu var. 2-ci matçda qələbə üçün əlimizdən gələni edəcəyik. “Abşeron Layns” yüksək səviyyədə olan komandadır. Amma mənim demək istədiyim mövzu var. "Şəki" hakimlərdən lazım olan hörməti görmür. Onların qərarlarında bunu görürük. Bu, çox məyusedici haldır. Çünki biz hər hakimə hörmət göstərsək də, təəssüf ki, bunun qarşılığını görmürük. Şəkidəki matçda əlimizi yanımıza salıb dayanmayacağıq, mübarizə aparacağıq”.