NTD komandasının basketbolçusu Tay Kokfild klubun mətbuat xidmətinə müsahibə verib. 

Prosport.Az həmin müsahibəni təqdim edir.

- Komandanın hazırkı formasını necə qiymətləndirirsiniz?
- Düşünürəm ki, hazırda ən yaxşı formadayıq. Müntəzəm mövsümün sonundan etibarən artıq pley-off ab-havası hiss olunurdu. Komandada hər şey çox pozitivdir. Motivasiyamız ən yüksək həddədir.

- NTD üçün mövsüm çətin keçir, lakin pley-off mərhələsi komanda üçün böyük şansdır. NTD bu çağırışa nə dərəcədə hazırdır?
- Mövsüm bəlkə də istədiyimiz kimi keçmir, amma pley-offa yüksəlmək bizə verilən ikinci şansdır və bu da oyunun gözəlliyidir. Basketbol seriyalar üzərində qurulan oyundur — bəlkə də indi bizim seriyamız başlayır. Ümid edirəm ki, pley-indəki tempimizi davam etdirə biləcəyik.

- NTD bu mövsüm "Neftçi" ilə artıq dörd dəfə qarşılaşıb. Rəqib haqqında nə düşünürsünüz? 
- "Neftçi" çox güclü komandadır və pley-offda uzağa getmək üçün bütün keyfiyyətlərə malikdir. Biz isə oyuna maksimum diqqətli yanaşmalı, minimum səhv etməli və onların səhvlərindən maksimum istifadə etməliyik. Maraqlı qarşılaşmalar olacaq. 

- Komandanın bu mövsüm üçün əsas hədəfi nədir və sizcə, NTD böyük uğur qazana bilərmi?
- Hər bir komandanın məqsədi çempion olmaqdır. Əgər bu məqsəd yoxdursa, ümumiyyətlə niyə oynayırıq? Mən həmişə bu komandaya inanıram və nə qədər irəli getsək də, bilirəm ki, sona qədər mübarizə aparmağa hazırıq.