"Rəqib oyuna çox yaxşı başladı. Biz də onlara istədiyimiz kimi qarşılıq verdik".

Prosport.Az xəbər verir ki, bunu "Naxçıvan"ın baş məşqçisi Nikola Bozinoski Azərbaycan Basketbol Liqasında "Sərhədçi"yə qarşı pley-inn mərhələsinin 2-ci oyunundan sonra deyib.

Mütəxəssis qalib gəldikləri qarşılaşmanı şərh edib: "Əvəzetmələr zamanı ehtiyat oyunçu seçimimizin daha geniş olması komandaya üstünlük qazandırdı və bu amil meydanda mübarizəni daha rahat aparmağımıza şərait yaratdı. Bu da oyunun qırılma anlarından biri oldu".

O, pley-offdakı rəqibləri olan "Sabah"dan da danışıb: "Bu komandaya qarşı mübarizə aparmaq bizim üçün prestijdir. Həmin matçda əlimizdən gələnin ən yaxşısını etməyə çalışacağıq".

Qeyd edək ki, "Naxçıvan" hər iki matçda "Sərhədçi"yə qalib gəlib (98:87, 93:80).