Bakıda keçirilən şahmat üzrə Dünya Kubokunda I raundun cavab görüşlərində Azərbaycan şahmatçısı Eltac Səfərliyə texniki məğlubiyyət verilib.

Prosport.Az-ın məlumatına görə, oyuna maksimum 15 dəqiqə gecikməyə icazə var.

Eltac Səfərli isə Bakıdakı tıxaca görə oyuna 22 dəqiqə gecikib və bu səbəbdən onun rəqibi olan Panama təmsilçisi Roberto Sançesə qələbə verilib. Bu gün saat 15:00-dan etibarən Səfərli II tura çıxmaq üçün bu rəqibi ilə tay-brekdə mübarizə aparacaq.

Qeyd edək ki, Azərbaycan təmsilçilərindən Vasif Durarbəyli, Ülviyyə Fətəliyeva, Gülnar Məmmədova və Gövhər Beydullayeva cavab görüşlərini qələbəylə başa vuraraq adını II tura yazdırıb. Cavab görüşlərində uduzan Nicat Məmmədov və Xanım Balacayeva Dünya Kubokunda iştirakını dayandırıb. İlk görüşdə uduzan və cavab görüşündə heç-heçə edən Məhəmməd Muradlı da yarışla vidalaşıb.

Onu da bildirək ki, II tur sabah başlayacaq. Bu mərhələdən etibarən Şəhriyar Məmmədyarov, Teymur Rəcəbov, Günay Məmmədzadə, o cümlədən dünya reytinqinin lideri Maqnus Karlsen mübarizəyə qoşulacaq.