Azərbaycanlı döyüşçü Tofiq Musayevin ABŞ-nin Sietl şəhərində keçirilən UFC Fight Night: Adesanya vs. Pyfer turnirindəki qələbəsi ona əlavə 100 min dollar bonus mükafatı qazandırıb.

Prosport.Az-ın xəbərinə görə, 36 yaşlı idmançının çilili İqnasio Baamondes üzərində hakimlərin yekdil rəyinə əsasən qazandığı qələbə gecənin döyüşü seçilib.

Bu ilin yanvarından açıqlanan qərara əsasən gecənin döyüşü və gecənin performansına görə qalib idmançılara 100 min dollar (50 min dollar artırılıb), təslim etmə (submission) və ya nokautla qalib gələnlərə 25 min dollar əlavə pul verilir.

Beləliklə, Tofiq Musayevlə İqnasio Baamondesin görüşü gecənin döyüşü seçilib. Hər 2 idmançıya 100 min dollar veriləcək. Gecənin performansını göstərən idmançılar isə meksikalı Aleksa Qraso və amerikalı Co Payfer olub. Onların hər biri 100 min dollar qazanıb.

Navaco Stirlinq (Yeni Zelandiya), Keysi ONill (Şotlandiya), Terans MakKini (ABŞ), Lans Qibson Cunior (Kanada), Yusri Belqaraui (Niderland), Leryan Duqlas (Braziliya), Maykl Kyeza (ABŞ) isə 25 min dollar əldə edib. Bunlardan yalnız italyan əsilli Kyeza rəqibi təslim olmağa məcbur edib. Digərləri nokaut və texniki nokautla qalib gəlib.

Qeyd edək ki, ötən il iyunun 21-də Nazim Sadıxovun amerikalı Nikolas Motta ilə Bakıdakı döyüşü (UFC on ABC: Hill vs. Rountree Jr.) həm gecənin döyüşü, həm də gecənin performansı seçilmiş və idmançımıza 100 min dollar təqdim olunmuşdu. Daha əvvəl isə Rafael Fiziyev bir neçə dəfə bu mükafatı qazanıb.