"Naxçıvan" Azərbaycan Basketbol Liqasında müntəzəm mövsümün sonuncu – XX turunda səfərdə "Quba"nı 103:96 hesabı ilə məğlub edib.
Prosport.Az xəbər verir ki, hər iki komandanın baş məşqçisi qarşılaşma ilə bağlı fikirlərini bölüşüb:
Şəhriyar Əsgərov ("Quba"): "Biz bilirdik ki, "Naxçıvan"a qarşı oyun çətin olacaq. Çünki onlar güclü komandadır. Balanslaşdırılmış heyətə malikdir. Onları təbrik edirəm. Pley-off mərhələsinə 2-ci pillədən qatılacaqlar. Yəqin ki, "8-liy"ə qalacaqlar. Bizim də məqsədimiz qalib gələrək, pley-off mərhələsində yenidən onlarla oynamaq idi. Amma bu oyunu basketbolçuların səhvi nəticəsində sonda uduzduq. Texniki səhvləri nəzərdə tuturam. Foul etməyə gecikdilər. Rəqib də 3 xallıq atış etdi. Biz isə texniki foul zamanı lazım olan xalı ata bilmədik. Matç da overtayma getdi. Orada isə oyunçuları dəyişə bilmədik. 3 oyunçumuz 40 dəqiqə meydanda oldu. Bu da özü böyük faktordur. Kris Klark 5 foulla meydanı vaxtından əvvəl tərk etdi ki, bu da təsir etdi. Bütün bu məsələləri göz önünə gətirəndə, demək olar ki, bu gün bizim günümüz deyildi. Kris Kuns texniki fouldan sonra cərimə atışını dəqiq yerinə yetirsəydi, yəqin ki, oyunu udacaqdıq, matç bu vəziyyətə gəlməyəcəkdi. Yorğunluq da öz sözünü dedi. Basketbolçularıma təşəkkür edirəm. Əllərindən gələni etdilər. Rəqibimiz güclü idi. Pley-in mərhələsində yolumuza davam edirik. Yəqin ki, rəqibimiz A qrupundan "Şəki" komandası olacaq. Onlara qarşı da bu cür mübarizə aparıb qalib gəlməyə çalışacağıq ki, "8-liy"ə qalaq. Basketbolçularıma təşəkkür edirəm və yolumuza davam edirik".
Nikola Bozinoski ("Naxçıvan"): "Oyuna yaxşı başlasaq da, daha sonra səbət altında adi səhvlərə yol verdik. Çox sayda sərbəst atışlardan yararlana bilmədik. Rəqib 51 dəfə 3 xallıq atış yoxladı. Bunların hamısı bizə çətin vəziyyət yaratdı. “Quba” 18 xallıq fərq yaxalasa da, komandamız xarakter göstərərək geridönüşə imza atdı. Dondre Reddiki xüsusi vurğulamaq istəyirəm. Son saniyə atışı ilə oyunu uzatmaya daşıdı. Əlavə vaxtda isə Hüseyn Əliyev yaxşı oyun nümayiş etdirdi. Komandama təşəkkür edirəm".