"Abşeron Layns" Azərbaycan Basketbol Liqasının XVIII turunda NTD-ni 107:88 hesabı ilə məğlub edib.

Prosport.Az xəbər verir ki, matçdan sonra hər 2 komandanın baş məşqçisi nəticə ilə bağlı danışıblar.

Tahir Baxşıyev (NTD): "Biz qələbə qazanmaq istəyirdik və bu oyuna ciddi hazırlaşmışdıq. Oyunun əvvəli bərabər mübarizə şəraitində keçdi. 4-cü hissəni isə tamamilə uğursuz keçirdik, xüsusilə müdafiədə zəif oynadıq. İndi bizi “Şəki”yə qarşı oyun gözləyir. Bu, bizim üçün çox vacib matçdır. Psixoloji baxımdan qalib gəlmək çox önəmlidir. Ümumilikdə cəmi 2 qələbə qazanmışıq və onların hər 2-si məhz “Şəki” üzərində olub".

Ərhan Tokər ("Abşeron Layns"): "Əslində asan qələbə kimi görünə bilər. Düşünürəm ki, belə deyil. Cəzalı və xəstə (qrip) olan oyunçularımız var idi. Trevion Lamar və Gediminas Orelik heyətdə qeyd etdiyim səbəblərdən bizə kömək edə bilmədilər. Milli komanda fasiləsində ölkəsinə gedən oyunçular var idi. Bu səbəbdən yaxşı hazırlaşmamışdıq. Demək olar ki, cəmi 3 məşq keçmişik. Bu məşqlərdə də məhz bu gün etdiyimiz zona müdafiəsini sınaqdan keçirdik. Normalda biz bunu etmirik. Ümumiyyətlə bu müdafiədən istifadə etmirik. Lakin bu gün foul problemi olma ehtimalları fonunda oyunu 5 legionerlə bitirə bilməmək təhlükəsi səbəbindən məhz belə müdafiə olunduq. Effektini gördük və Fast Breyklərdə asan xallar qazandıq. Ona görə qələbəmiz kənardan asan göründü. Basketbolçularıma təşəkkür edirəm. Qələbə münasibəti ilə təbrik edirəm. Müntəzəm mövsümdə cəmi 2 oyun qaldı. Bundan sonra daha yaxşı hazırlaşıb  pley-offa tam hazır getmək istəyirik".