"Sumqayıt" Azərbaycan Basketbol Liqasının XVIII turunda səfərdə "Quba"ya 117:116 hesabı ilə qalib gəlib.

Prosport.Az xəbər verir ki, matçdan sonra hər 2 komandanın baş məşqçisi fikirlərini bölüşüb.

Vadim Kuramşın ("Sumqayıt"): "Çox vacib qələbə qazandıq. Son saniyələrə qədər mübarizə aparan oyunçularıma təşəkkür edirəm. Hərçənd 20 xal fərqilə öndə olsaq da, sonuncu periodda üstünlüyümüzü əldən verməyə başladıq. "Quba"nın məhsuldar və  güclü komanda olduğunu nəzərə alsaq belə çətinliyə düşəcəyimizi gözləyirdim. İstənilən halda, qələbə hesabını qoruya bildiyimizə görə şadam. Keon Klerqot bu gün 50 xal topladı. O, bizim liderdir, biz ona güvənirik".

Şəhriyar Əsgərov ("Quba"): "Gərgin oyun alındı. İlk dəqiqələrdə müdafiədə çox səhvə yol verdik. Belədə, rəqib hesabda çox böyük fərq yaratdı. Sonradan onlara çatmaq qeyri-mümkün görünürdü. Lakin bunu bacardıq. Yaxşı mübarizə apardıq. Matçın nəticəsi xeyrimizə ola bilərdi. Sadəcə son saniyə atışımız uğurlu olmadı və uduzduq. Oyunçularım əllərindən gələni etdilər. Sadəcə dediyim kimi, 1-ci və 2-ci hissədə müdafiəmiz zəif çıxış etdi. Rəqibə boşluqlar verdik. "Sumqayıt"ı təbrik edirəm, onların atışları uğurlu alındı. Komandamız isə əzmkarlıq göstərdi. Hər 2 komandaya oynadıqları oyuna görə böyük təşəkkür düşür. Çox maraqlı matç oldu. Azarkeş dəstəyimiz də var idi, sağ olsunlar, sona qədər bizi dəstəklədilər. Onlara da minnətdaram. Gələcəyə nikbin baxırıq. Müntəzəm çempionatda 2 oyunumuz qaldı. Onları da qalib başa vurub, bacardığımız qədər pley-in mərhələsibə yüksək yerdə başlamaq istəyirik. Mübarizə davam edir".