Azərbaycan Basketbol Federasiyasının məşqçiləri Ləman İbrahimova və İlham Ağayev Macarıstan İdman Elmləri Universitetində təşkil olunan Beynəlxalq Məşqçilik Kursunda (ICC) uğurla iştirak ediblər.

Prosport.Az xəbər verir ki, Beynəlxalq Olimpiya Komitəsinin “Olympic Solidarity” proqramının dəstəyi ilə həyata keçirilən 8 həftəlik kurs çərçivəsində hər 2 məşqçi beynəlxalq təcrübə qazanaraq proqramı müvəffəqiyyətlə başa vurub və müvafiq sertifikatlarla təltif olunub.

Qeyd edək ki, UGBL U-13 liqasında fəaliyyət göstərən məşqçi İlham Ağayev və U-12 basketbol liqasında "Ordu" klubunun baş məşqçisi, eyni zamanda Bakı Basketbol Akademiyasında məşqçilik fəaliyyəti göstərən Ləman İbrahimova bu kurs vasitəsilə ölkəmizi beynəlxalq arenada təmsil ediblər. Ləman İbrahimova Beynəlxalq Məşqçilik Kursuna qəbul olunan ilk azərbaycanlı məşqçi kimi də tarixə düşüb.

Bu proqram yerli məşqçilərin peşəkar inkişafına töhfə verməklə yanaşı, ölkə basketbolunun gələcək inkişafı baxımından mühüm əhəmiyyət daşıyır.