"Şəki" basketbol üzrə Azərbaycan Kubokunun 1/4 final mərhələsində "Abşeron Layns"a 93:85 hesabı ilə qalib gəlib.

Prosport.Az xəbər verir ki, hər iki komandanın baş məşqçisi oyunla bağlı fikirlərini bölüşüb.

Bedri Meriç ("Şəki"): "İlk növbədə “Abşeron Layns” komandasını təbrik edirik, çox güclü və yaxşı basketbol oynayan komandadır. Amma bu gün biz matçı daha çox istədik. Çempionatda onlarla son matçımızda da oyunun sonunda etdiyimiz bəsit səhvlərə görə uduzmuşduq. Amma bu gün oyunçularım matç sonunda eyni səhvləri etmədilər. Bütün oyunçularımla fəxr edirəm. Yarımfinalda sabahkı rəqibimiz bizə yad deyil. “Gəncə” də geniş heyətlə oynayan güclü komandadır. Mövsümün əvvəlində onları 1 dəfə Gəncədə məğlub etmişdik. Şəkidəki matçımızda isə qalib gələ biləcəyimiz halda, oyun sonunda bəsit səhvlərlə uduzmuşduq. Sabah əlimizdən gələni sonunadək edəcəyik. Qalib gəlmək və ya uduzmaq çox vacib deyil. Əsas odur ki, yaxşı mübarizə aparıb, yaxşı basketbol oynayaq".

Erhan Toker ("Abşeron Layns"): "İlk olaraq "Şəki"ni təbrik edirəm. Yaxşı mübarizə apardılar və gözəl oyun sərgilədilər. Bizim bir neçə oyunçumuz pis çıxış etdi. Komanda olaraq pis oynadıq deyə bilmərəm. 2 yerli oyunçu ilə bir qədər oyun sxemimiz pozuldu. Bəzi oyunçularımız performanslarından aşağı çıxış etdilər (adlar önəmli deyil). Bütün bunlarla yanaşı, düşünürəm ki, hakimlər də bizim lehimizə bəzi foullarda fit çalmadılar. Məğlub olduq, rəqibi bir daha təbrik edirəm. Biz isə yolumuza ölkə çempionatında ən yaxşı şəkildə davam etməyə çalışacağıq".