"Sabah" basketbol üzrə Azərbaycan Kubokunun 1/4 final mərhələsində "Quba"ya 113:76 hesabı ilə qalib gəlib.

Prosport.Az xəbər verir ki, hər iki komandanın baş məşqçisi oyunla bağlı fikirlərini bölüşüb.

Şəhriyar Əsgərov ("Quba"): "Çox güclü rəqiblə qarşılaşdıq. Məncə, bu cür komandaya qarşı heç də pis oynamadıq. Belə komandalara qarşılıq verəndə, öz gücümüzü bir daha sınamış oluruq. Son dəqiqələrdə gənc oyunçuları da meydana buraxdım. Hesab bir az daha böyüdü. "Sabah" kimi komandaya 25-30 xallıq fərqlə uduzmaq, məncə, heç də pis deyil. Kubok macəramız bitdi. İndi ABL-ə köklənəcəyik. "Sabah"la görüşdəki performansımız bizə yenə də stimul verdi. Ümidvaram ki, ABL-də qarşıdakı matçlarda uğurlu olacağıq".

Rimas Kurtinaytis ("Sabah"): "Oyunçuların bəzilərində mikrozadələr var idi. Onlardan bəziləri oynamadı. Çünki finala qədər yaxşı formada olmalıyıq. Buna baxmayaraq, yaxşı oynadıq və layiqli qələbə qazandıq. Düzdür, oyunun əvvəlində müdafiə cəhətdən istənilən qədər yaxşı oynamasaq da, gedişatda bunu düzəltdik. Yerli basketbolçular liqada kifayət qədər oyun praktikası qazanırlar. Endər zədədən sonra hələ tam formada deyil və bizim əsas məqsədimiz onu optimal formasına qaytarmaqdır. Növbəti mərhələdəki rəqibimiz "Ordu" klubudur. Yaxşı komandadır, onlara hörmət edirik. Çox istəkli komandadır, amma buna baxmayaraq qələbə qazanmağa çalışacağıq".