"Şamaxı" futbol klubunun İdarə Heyətinin sədri Elçin Usuba Azərbaycan Gimnastika Federasiyasında (AGF) vəzifə verilib.

Prosport.Az-ın xəbərinə görə, Vəkillər Kollegiyası Rəyasət Heyətinin də üzvü olan Elçin Usub sözügedən federasiyada Apellyasiya Komissiyasının üzvü seçilib.

Həmçinin, Xaqani Məmmədov və Rəşad Axundov da bu komissiyanın üzvü olub.

Bundan başqa, ötən ay Azərbaycan Üzgüçülük Federasiyasına 4-cü vitse-prezident seçilmiş sabiq millət vəkili Jalə Əhmədova da AGF-də təmsil olunacaq. Güləş Federasiyasının vitse-prezidenti Namiq Əliyev də bu komissiyaya üzv seçilib. J.Əhmədova ilk, N.Əliyev isə 2-ci dəfə bu vəzifəyə seçilir. Onlardan başqa, Nazim Rəcəbov, Aytac Qasımova və Elmar Cəlilov da İntizam Komissiyasının üzvü kimi fəaliyyət göstərəcək.

Qeyd edək ki, ölkənin I vitse-prezidenti Mehriban Əliyeva yenidən 5 il müddətinə AGF prezidenti seçilib. I vitse-prezidentin Katibliyinin rəisi Altay Həsənov isə yenidən vitse-prezident olub. Millət vəkili Rauf Əliyev, Heydər Əliyev adına İdman-konsert Kompleksinin sabiq direktoru Rafiq Beybutov və Vəfa Bəkərova isə növbəti 5 il müddətinə İcra Komitəsinin üzvləri kimi təsdiq edilib.