"Ötən Azərbaycan çempionatında qələbəm sensasiya deyildi"

Prosport.Az xəbər verir ki, bunu beynəlxalq qrosmeyster, son Azərbaycan çempionu Rauf Məmmədov deyib.

O, yarışla bağlı fikirlərini bölüşüb: "Mən ilk dəfə Azərbaycan çempionatına qatılarkən 15 yaşım var idi və çempion olmuşdum. Ona görə budəfəki ölkə çempionatında da sürpriz nəticələr ola bilər. İndiki cavanlar çox güclü mübarizə aparır. 30 iştirakçının hər biri çempionluğa namizəddir. Təcrübəli qrosmeysterlə gənc şahmatçıların qarşılaşması maraqlı mübarizə deməkdir".

Rauf Məmmədov bu il də çempion olmaq üçün çalışacağını bildirib: "Ötənilki qələbə sürpriz deyildi. Bilirəm ki, çoxlarınız yarımfinalda Teymur Rəcəbov üzərində qələbəni sensasiya sayırsınız. Ancaq mənim üçün sürpriz deyildi".

Qeyd edək ki, Azərbaycan çempionatına 46 şahmatçı qatılacaq. Turnir fevralın 22-dək davam edəcək. Kişi şahmatçılarda 30, qadınlarda isə 16 iştirakçı mübarizə aparacaq.

Yarışın mükafat fondu 92 min manat təşkil edir. Bu məbləğdən 62 min manat kişilərin, 30 min manat isə qadınların çempionatına aiddir.