"1 il ərzində klassik şahmatda çıxış etməyənlər "inactive" (fəaliyyət göstərməyən) hesab ediləcəklər. Kim ki iştirak etməyəcəksə, gələn il Azərbaycan çempionatında yarışa bilməyəcək. Onlar yalnız I dəstədə çıxış edə biləcək. Ona görə də şahmatçıların nəzərinə çatdırıram ki, yarışlara qatılsınlar".  

Prosport.Az xəbər verir ki, bunu Azərbaycan Şahmat Federasiyasının (AŞF) prezidenti Mahir Məmmədov ölkə çempionatının açılış mərasimindən sonra jurnalistlərə açıqlamasında deyib.

AŞF rəhbəri yarışla bağlı təəssüratlarını bölüşüb:

"Budəfəki Azərbaycan çempionatı da maraqla gözlənilir. Yarış olimpiya sistemi üzrə FİDE oyun qaydaları əsasında təşkil olunacaq. Bildiyiniz kimi, mükafat fondu artılıb. Gələn il mükafat fondunun bir qədər də artırılması nəzərdə tutulub. Bütün şahmatçılar çempionatda yer alıb. Bəzi qrosmeysterlər yarışa qatıla bilməyiblər. Vasif Durarbəyli ABŞ-də yaşayır. Namiq Quliyev isə Fransadan gələrək, turnirə qatılmalı idi. Niyəsə gələ bilmədi. Teymur Rəcəbova gəlincə, o, şahmatın klassik növündə təşkil olunan yarışlara az-az qatılır. Qadınların yarışında bütün güclü oyunçular mübarizə aparacaq. Bildirməliyik ki, ölkə çempionatında yer almayan şahmatçılar Azərbaycan Şahmat Federasiyasının yardım proqramından məhrum olur".

Qeyd edək ki, Azərbaycan çempionatına 46 şahmatçı qatılacaq. 8 fevralda kişilərin yarışı ilə başlayacaq turnir fevralın 22-dək təşkil olunacaq. Kişi şahmatçılarda 30, qadınlarda isə 16 iştirakçı mübarizə aparacaq.

Yarışın mükafat fondu 92 min manat təşkil edir. Bu məbləğdən 62 min manat kişilərin, 30 min manat isə qadınların çempionatına aiddir.