"Gəncə" Azərbaycan Basketbol Liqasının XI turundan təxirə salınmış oyunda NTD-yə 102:95 hesabı ilə qalib gəlib.

Prosport.Az xəbər verir ki, matçdan sonra hər iki komandanın baş məşqçisi fikirlərini bölüşüb.

Tahir Baxşıyev (NTD): "Yaxşı oyun alındı. Gərgin mübarizənin şahidi olduq. Qalib gələ bilərdik. Amma yenə də ribaundlarla bağlı problem öz sözünü dedi - bu göstəricidə rəqibə uduzduq. Ümumilikdə isə oyun bərabər səviyyədə keçdi. “Gəncə” çox yaxşı komandadır. Onları qələbə münasibətilə təbrik edirəm. Biz isə “Neftçi” ilə oyuna hazırlaşacağıq".

Halil Atlı ("Gəncə"): "Öncə qələbə münasibətilə komandamı təbrik edirəm. Asan oyun olmayacağını bilirdik. Çünki NTD çətin dönəmdən keçir. Can alıb, can verirlər. Bu gün də bizə qarşı gərgin mübarizə aparacaqlarını, matçın belə keçəcəyini yəqin etmişdik. Ona görə də oyunun əvvəlindən sonuna kimi nəzarəti əlimizdə saxlamağı bacardıq. Məşqdə çalışdıqlarımızı meydanda reallaşdırdıq. Sadəcə, gözlədiyimızdən daha artıq xalı səbətimizdə gördük. Amma bu da çox normaldır. Rəqibin heyətində yaxşı atışları olan oyunçular var, oyun quruluşları da asanlıqla xal toplamağa hesablanıb. Fikrimcə, xeyrimizə olan bizim hücumda orta hesabla topladıqlarımızı keçməyimiz və müdafiədə yaxşı oynamağımız oldu. Bizim üçün əla qələbə oldu. Sıx təqvimdən keçirik, bazar günü "Şəki" ilə oynayacağıq, bütün diqqətimiz həmin matça yönəlib".