"Naxçıvan" Azərbaycan Basketbol Liqasının XIV turunda səfərdə "Sərhədçi"yə 65:57 hesabı ilə qalib gəlib.

Prosport.Az xəbər verir ki, hər iki komandanın baş məşqçisi qarşılaşma ilə bağlı fikirlərini bölüşüb.

Nikola Bojinoski ("Naxçıvan"): "Bu görüşə fərqli ilk "beşlik"lə start verməli olduq. Komandamızda zədəli oyunçular olduğuna görə bu cür addım atdıq. Buna görə də görüşün əvvəllərində istədiyimiz kimi çıxış edə bilmədik. Daha sonra isə geridönüş etməyi bacardıq. Hər iki kollektivin hücumda inamsız təsir bağışlamağı hesabda da özünü göstərdi. Ümid edirəm ki, uzun oyunçu mövqeyinə transferi növbəti həftəyədək reallaşdıracağıq. Önümüzdə 2-3 seçim var. Yekunda komandamız üçün ən xeyirli olanını heyətimizə qatacağıq".

Anar Sarıyev ("Sərhədçi"): "Oyuna yaxşı başladıq. İlk yarıda müdafiədə inamlı idik. Rəqib cəmi 33 xal ata bildi. Amma hücumda istədiyimizi göstərə bilmədik. Məncə, daha yaxşı oynaya, xal fərqi yarada bilərdik. Oyunçularımızdan Mark Vans zədə aldı. O bizim əsas heyət üzvümüz idi. Bu da matça təsir etdi. Açığı, son perioda görə hakimlərə səslənmək istəyirəm. Hakimlərə diqqət yetirmək lazımdır, çünki həddindən artıq sadə səhvlər edirlər. Bu da məşqçi olaraq məni narahat edir. Baxmayaraq ki, bizim də səhvlərimiz var idi, amma hakimlərin durduğu yerdə Nicat Nəsirova 4-cü foulu verməsi narahatedici məqam idi. Çünki bundan sonra o, müdafiədə normal çıxış edə bilmədi. Hücumda foul olanda hakimlər vermirdi. Oyuna nəzarəti tamamilə itirmişdilər. Baş hakimlərdən xahiş edirəm ki, digər köməkçilərə səhvlərini göstərsin. Daha diqqətli olmağı tapşırsınlar".